موقتەدا سەدر ڕێبەری ڕەوتی سەدر، داوای لێبوردنی لە گەلی عێراق كرد و دژایەتیی خۆی بۆ شەڕ و توندوتیژی دووپاتكردەوە و هەڕەشەی لە لایەنگرانی كرد ئەگەر نەكشێنەوە، ئەوا حاشایان لێدەكات و هەڵوێستی بەرامبەریان دەبێت.
لە كۆنگرەیەكی ڕۆژنامەوانیدا لە حەنانە، موقتەدا سەدر ڕێبەری ڕەوتی سەدر ڕایگەیاند، لە دوێنێوە بە یەكجاری لە گۆڕەپانەكە كشاوەتەوە و دژی شەڕ و توندوتیژییە و وتی، “بكوژ و كوژراو وەكو یەكترن و هەردووكیان لە دۆزەخدا دەبن. پێشتر نیشتمانەكەم دیلی گەندەڵی بوو، بەڵام ئێستا دیلی گەندەڵی و توندوتیژیشە”.
لە درێژەی وتەكەیدا لەبارەی توندوتیژییەكانی دوێنێ و ئەمڕۆوە سەدر ڕایگەیاند، “نەفرەت لەو شۆڕشە كە هانا بۆ گولـلە و ئاڕ بی جی ببات. ئەو شۆڕشەی توندوتیژیی تێكەڵببێت شۆڕش نییە و من چیتر بە شۆڕش ناوینابەم”.
ڕێبەری ڕەوتی سەدر، سوپاسی هێزە ئەمنییەكانی كرد و هەڵوێستیانی بە شكۆمەند ناوبرد. هەروەها سوپاسی ئاراستەی چەكدارانی حەشدی شەعبی كرد و وتی، “سوپاس بۆ چەكدارانی حەشدی شەعبی، ڕەنگە سەركردە و فەرماندەكانیان پەیوەندییان بەم دۆخەوە هەبێت، بەڵام دڵنیام چەكدارەكانیان لەم دۆخە بێبەرین و یەك گولـلەش ناتەقێنن”.
موقتەدا سەدر داوای لە لایەنگرانی كرد لە ماوەی كاتژمێرێكدا بكشێنەوە و هەڕەشەی لێكردن كە ئەگەر نەكشێنەوە، ئەوا هەڵوێستی بەرامبەریان دەبێت و ڕایگەیاند، “ئەگەر خۆپیشاندەران لە بەردەم پەرلەمان نەكشێنەوە حاشایان لێدەكەم و هەڵوێستێكی دیكەم بەرامبەریان دەبێت. خەڵك تاوانیان چییە لە دوێنێوە تۆقێندراون و لە ماڵەكانیاندا بەستراونەتەوە”.
دوای وتەكانی سەدر، بەشێك لە لایەنگرانی دەستیانكرد بە كشانەوە لە ناوچەی سەوزی بەغداد.
دوێنێ دووشەممە موقتەدا سەدر لە تویتێكدا كشانەوەی یەكجاریی خۆی لە پرۆسەی سیاسیی عێراق ڕاگەیاند و ڕاستەوخۆ دوای پەیامەكەی، لایەنگرانی ڕووبەڕووی هێزە ئەمنییەكانی ناوچەی سەوزی بەغداد بوونەوە و شەڕ و كوشتار دەستیانپێكرد.
