تۆمەتبارێك لە دەربەندیخان دەستگیركرا، كوڕێكی تەمەن 29 ساڵە و 16 ملیۆن دیناری “بە ناوی نوشتە و دوعاوە” لە كچێك وەرگرتووە و پۆلیس دەڵێت، “بەردەوام هەڕەشەی زۆر توندی لە كچەكە كردووە و ترساندوویەتی”.
بەڕێوەبەرایەتیی بەرەنگاربوونەوەی توندوتیژیی دژی ژنان و خێزان لە سلێمانی، هەواڵەكەی ڕاگەیاند و ئاشكرایكرد، شەوی 22ی ئابی 2022 مەفرەزەیەك لە ئەفسەر و كارمەندانی نووسینگەی دەربەندیخانی سەر بە بەڕێوەبەرایەتیی بەرەنگاربوونەوەی توندوتیژیی دژی ژنان و خێزان، تۆمەتبارێكی تۆڕە كۆمەڵایەتییەكانی بە ناوی (ش. ن. ڕ) كە بە ڕەگەز كوردە و تەمەنی (29) ساڵە دەستگیركرد.
بەپێی ڕاگەیەندراوی بەڕێوەبەرایەتییەكە، “تۆمەتبار بە ناوی نوشتە و دوعاوە بڕی (16) ملیۆن دیناری لە كچێك وەرگرتووە و بەردەوام هەڕەشەی زۆر توندی لێكردووە و ترساندوویەتی، پاش وەرگرتنی زانیاریی ورد و ماندووبوونێكی زۆر، توانرا دەستگیربكرێت و ڕادەستی یاسا بكرێت”.
تۆمەتبارەكە لە دەربەندیخان دەستگیركراوە و ڕاگەیەندراوەكە دەڵێت، “دادوەری لێكۆڵینەوەی دەربەندیخان بەپێی ماددەی 456 لە یاسای سزادانی عێراقی، پەڕاوی لێكۆڵینەوەی بۆ كردووەتەوە”.
