یەكێتیی ئەوروپا پێیوایە وەڵامدانەوەی ئێران بۆ پێشنیارەكەی سەبارەت بە ڕێككەوتنی ئەتۆمی شیاو (مەعقول)ە، لەكاتێكدا تاران ڕەخنە دواخستنی واشنتن و بێدەنگی برۆكسل لە وڵامدانەوەی پێشنیارەكانی زیندووكردنەوەی ڕێككەوتنی ئەتۆمی دەگرێت، پاش تێپەڕبوونی هەفتەیەك.
جۆسیپ بۆریل، كۆمسیاری یەكێتیی ئەوروپا بۆ سیاسیەتەكانی دەرەوە و ئاسایش ئەمڕۆ ڕایگەیاند، وەڵامدانەوەی ئێران بۆ ئەو پێشنیارەی یەكێتییەكەیان بەمدواییە دەربارەی ڕێككەوتنی ئەتۆمی پێشكەشیكرد شیاوە.
وتیشی، وەڵامەكەی ئێرانی بۆ ویلایەتە یەكگرتووەكان گواستووەتەوە، بەڵام تائێستا واشنتن بە فەرمی وەڵامی نەداوەتەوە.
تاران هەفتەی ڕابردوو وەڵامی پێشنیارەكەی دایەوە، دوای دەستپێكردنەوەی وتووێژە ناڕاستەوخۆكانی ئەمریكا و ئێران كە ماوەی 16 مانگی خایاند.
هەر ئەمڕۆ ئێران لە زاری وتەبێژ بەناوی وەزارەتی دەرەوە ڕەخنەی لە دواخستنی وەڵامی ئەمریكا بۆ وڵاتەكەی گرت، جگە لە ڕەخنەگرتن لە بێدەنگی ئەوروپا لەو بارەیەوە.
