ژن و پیاوێك لە ژووری نووستنەكەیاندا بە دوای شوێنەواردا گەڕاون، لە ژێر سیسەمەكەی خۆیاندا كەوتوونەتە چاڵەوە و گیانیان لەدەستداوە.
ڕووداوەكە لە میسر ڕوویداوە، ژن و پیاوێكی دانیشتووی پارێزگای جیزە، بە پاچ و كەرەستەی هەڵكۆڵین چاڵێكی گەورەیان لە ژێر سیسەمەكەیاندا هەڵكەندووە و بە دوای پارچە و كەرەستەی شوێنەواریدا گەڕاون.
بەڕێوەبەرایەتیی ئاسایشی جیزە دەڵێت، كوڕێك ئاگاداریكردوونەتەوە لە گیانلەدەستدانی دایك و باوكی، كاتێك تیمی لێكۆڵینەوە گەیشتوونەتە ماڵەكەیان، تەرمی ژن و پیاوێكیان لە ناو چاڵێكی قووڵی ناو ژووری نووستنەكەیاندا بینیوە و كەرەستەی چاڵهەڵكەندن لە ناو ژوورەكەدا هەبوون.
بەپێی ڕاگەیەندراوی بەڕێوەبەرایەتیی ئاسایشی جیزە، دوای گواستنەوەی تەرمەكان، خانووەكە خراوەتەژێر چاودێری و پاسەوانییەكی وردەوە و ڕێگەنادەن كەس سەردانی بكات تا ئەو كاتەی تیمەكانی شوێنەوارناسی پشكنینی بۆ دەكەن.
