ئێوارەی ئەمڕۆ هەینی فڕۆكە جەنگییەكانی توركیا، خاكی هەرێمی كوردستانیان لە سنووری پارێزگای دهۆك بۆردومانكرد و تا ئێستا بۆردومانەكە بەردەوامە.
پەیامنێرمان لە پارێزگای دهۆك ڕایگەیاند، لە دوای كاتژمێر چواری ئێوارەی ئەمڕۆوە، فڕۆكە جەنگییەكانی توركیا زنجیرە چیای مەتین لە سنووری قەزای ئامێدی بۆردوماندەكەن.
ڕوونیكردەوە، بۆردومانەكە لە بەرامبەر هەردوو گوندی سگێرێ و سەرگەلێ لە سنووری ناحیەی دێرەلوك لە قەزای ئامێدی دەكرێت و وتی، “تا ئێستا فڕۆكە جەنگییەكانی توركیا بەردەوامن لە بۆردومانكردنی ناوچەكە”.
بەپێی زانیارییەكان، بەهۆی بۆردومانی بەردەوامی فڕۆكە جەنگییەكانی توركیاوە، دانیشتووانی گوندی سگێرێ زێدی خۆیان بەجێهێشتووە، بەڵام گوندی سەرگەلێ دانیشتووانەكەی لەوێ ژیاندەكەن و نازانرێت زیانەكانی بۆردومانەكەی ئەمڕۆ چین.
