ئیسرائیل و توركیا بڕیاریاندا تەواوی پەیوەندییە دیپلۆماسییەكانی نێوانیان دەستپێبكەنەوە پاش ساڵانێك لە ناكۆكی لە پەیوەندییەكانی نێوان ئەنقەرە و تەل ئەبیب.
یائیر لابید سەرۆك وەزیرانی ئیسرائیل ئەمڕۆ ڕایگەیاند، حكومەتەكەی تەواوی پەیوەندییە دیپلۆماسییەكانی لەگەڵ توركیا دەستپێدەكاتەوە و هەردوولا بڕیاریانداوە نوێنەرایەتییە دیپلۆماتییەكانیان بگەڕێننەوە پاش ساڵانێك لە ناكۆكی لەنێوانیاندا.
گەڕانەوەی تەواوی پەیوەندییەكان، گەڕاندنەوەی هەردوو باڵیۆز و كونسوڵی گشتی هەردوو وڵاتیش دەگرێتەوە.
لابید لە ڕاگەیەندراوێكدا ئەو كارەی بە “دەستكەوتێكی گرنگ بۆ سەقامگیریی هەرێمایەتی و هەنگاوێكی ئابوریی زۆر گرنگ” بۆ ئیسرائیلییەكان ناوبرد.
لە ئەنقەرەشەوە مەولود چاوش ئۆغلۆ وەزیری دەرەوەی توركیا سەرەڕای دوپاتكردنەوەی ئاساییكردنەوەی پەیوەندییەكانی نێوان هەردوولا و گەڕاندنەوەی باڵیۆز و كونسوڵەكان وتی، سەرەڕای ئەوە توركیا “واز لە دۆسیەی فەڵەستین ناهێنێت”.
