بەرپرسی ڕێکخراوی بازرگانیی ئێران ئاشکرایکرد لەماوەی حەوت مانگدا ئێران بە بەهای پێنج ملیار دۆلار کاڵای ڕەوانەی عێراق و هەرێمی کوردستان کردووە.
فەرزاد پیتڵن، بەرپرسی ڕێکخراوی بازرگانیی ئێران لە لێدوانێکدا بۆ ئاژانسی تەسنیمی ئێرانی ئاشکرایکردووە، “لەماوەی حەوت مانگی ڕابردوودا ئێران 17 ملیۆن و 600 هەزار تۆن کاڵای هەناردەی عێراق و هەرێمی کوردستان کردووە.
بە وتەی ئەو بەرپرسە بازرگانییەی ئێران، لەدوای عێراق و هەرێمی کوردستان ئێران بڕی هەناردەی بۆ وڵاتی چین بووە بە بەهای چوار ملیار و 400 ملیۆن دۆلار و دوای چین وڵاتی ئیمارات بە دوو ملیار و 200 ملیۆن دۆلار و لە پلەی سێیەمدا تورکیا دێت بە یەک ملیار و 500 ملیۆن دۆلار.
بە وتەی بەرپرسی ڕێکخراوی بازرگانیی ئێران، ئەو کاڵا و شمەکانەی کە ئێران هەناردەی عێراق و هەرێمی کردووە بریتین لە (گازی سروشتی و کارەبا و ئامێرەکانی فێنکەرەوە و گەرمکەرەوە و کاشی و سیرامیک) و لە خۆراکیشدا سەدان جۆر بەرهەمی خۆراکی و سەوزە و میوەن.
فەرزاد پیتڵن، ئاماژە بەوەشدەکات، بەشێکی زۆری ئەو کاڵا و خۆراکانەی بۆ عێراق نێرداون لە سنورەکانی هەرێمی کوردستانەوە ڕەوانەکراون.
