نرخی نەوت ئەمڕۆ چوارشەممە، لە بازاڕەکانی جیهاندا بەرزبوونەوەی تۆمارکرد، هۆکارەکەشی بۆ کەمبوونەوەی یەدەگی نەوتی ئەمریکا و پێشبینییەكان سەبارەت بە زیادبوونی خواست لەسەر وزە دەگەڕێتەوە.
نرخی بەرمیلێک نەوتی خاوی برێنت بە بڕی نزیكەی نیو دۆلار و ڕێژەی0.7% بەرزبووەوە و نرخەکەی گەیشتە 69.37 دۆلار، ئەوەش بەرزترین نرخە لەماوەی حەوت هەفتەی ڕابردوودا پێیگەیشتووە.
هەروەها نرخی یەک بەرمیل نەوتی خاوی تەکساسیش بەهەمانشێوە نزیكەی نیو دۆلار و ڕێژەی %0.7 بەرزبووەوە و نرخەکەی گەیشتە 66.17 دۆلار، نەوتی تەکساس لە 8ی ئازاری ڕابردووەوە نەیتوانیوە بگاتە ئەو نرخە.
لە ڕۆژی سێشەممەوە و دوای داتا و پێشبینییەكانی پەیمانگای پترۆڵی ئەمریکی API، نرخی هەردوو جۆرە سەرەکییەکەی نەوت بەڕێژەی %2 بەرزبوونەتەوە.
بەپێی داتاکانی ئەو پەیمانگا ئەمریکییە، لە هەفتەی ڕابردوودا یەدەگی نەوتی ئەمریکا 7.69 ملیۆن بەرمیل کەمبووەتەوە و ئەمەش بەرزترین ئاستی کەمبوونەوەیە لە مانگی کانونی دووەمی ئەمساڵەوە تۆماری کردبێت.
