بەشێک لە فەرمانبەرانی هەرێمی كوردستان، كاری دووەمیان لێ قەدەغە دەكرێت و چیتر ناتوانن لە كەرتی تایبەت كار بكەن.
ئەنجومەنی وەزیران، بە نووسراوێکی فەرمی، وەزارەتی دارایی ئاگاداردەکاتەوە، کە نابێت فەرمانبەرانی پلە تایبەت و باڵا لە کەرتی تایبەتدا کاربکەن.
بەپێی نووسراوەكەی ئەنجومەنی وەزیرانی هەرێم، کە بۆ وەزارەتی دارایی نێردراوە، هاتووە، “لەسەر کارکردنی فەرمانبەران دوای دەوامی فەرمی، فەرمانبەرانی پلە تایبەت و پلە باڵا، تا لەو پلەیەدا بن، نابێت لە کەرتی تایبەتدا کار بکەن”.
بۆیە لای خۆیەوە وەزارەتی دارایی وەزارەتەكانی دیكەی ئاگاداركردووەتەوە، دەبێت فەرمانگە و وەزارەتەکان ناوەڕۆکی بڕیارەکەی حكومەت جێبەجێ بکەن.
