پیاوێکی تەمەن 40 ساڵی دانیشتووی ناحیەی هەریر، لەبری قەرز کچێکی تەمەن 13 ساڵانی قەرزارەكە وەردەگرێت و هاوسەرگیری لەگەڵ دەکات.
کەسێکی نزیکی پیاوەکە ئەمڕۆ شەممە 28ی تشرینی دووەم بە تۆڕی میدیایی ئێستای وت، دوای ئەوەی کەسێک بە بڕی پێنج ملیۆن دینار قەرزداری ئەو پیاوە دەبێت و ناتوانێت قەرزەکەی بداتەوە، بەناچاری کچێکی خۆی لەبری قەرزەکە پێشکەش كردووە و پیاوەکەش هاوسەرگیری لەگەڵ كردووە و دوێنێ گواستویەتییەوە.
وتیشی، “ئەو كچە هاوسەری سێیەمیەتی و پێشوتر پیاوەكە لەگەڵ ژنێكی عەرەب و یەكێكی دیكەی کورد هاوسەرگیری کردووە و خاوەنی چەند منداڵێکە”.
پیاوەكە ناوی (م. ن. ڕ)ەو تەمەنی 40 ساڵە و پێشمەرگەیە و دانیشتووی ناحیەی هەریری سەر بە قەزای شەقڵاوەیە.
ڕوداوەكە كاردانەوە و ناڕەزایەتی بەشێك لە چالاكوانانی لێكەوتەوە و لە بەیاننامەیەكدا كە ئاراستەی سەرۆكایەتی هەرێم و حكومەت و پەرلەمان كراوە داوادەكەن “ڕێگا لەم هاوسەرگیرییە نایاساییە و هاوشێوەکانی بگرن و مافی ئەم منداڵە بەزوترین کات بگەڕێندرێتەوە”.
بەیاننامەكە كە لەلایەن ژمارەیەك لە ڕێكخراوەكان و نوسەر و ڕۆژنامەنوس و چالاكوانەوە واژۆكراوە تیاشیدا داواكراوە، ئەوانەی ئەم کارەیان دەرهەق بە منداڵەکە کردووە “بەتوندترین شێوە سزابدرێن بۆ ئەوەی جارێکی تر مافی منداڵ و ئافرەت پێشێل نەکرێت و ڕوداوی وا ڕونەداتەوە”.
