لە ڕۆژئاوای كوردستان سێ كەس دەستگیركران، هەسەدە بە سیخوڕ ناویبردوون و دەڵێت، كاریان بۆ توركیا كردووە و لە شەهیدكردنی چەند فەرماندەیەكی ڕۆژئاوای كوردستاندا تێوەگلاون.
ئاژانسی هەواڵی فورات نیوزی ڕۆژئاوای كوردستان لەزاری هێزەكانی سوریای دیموکرات – هەسەدەوە بڵاویكردەوە، لە ئۆپەراسیۆنێكی تایبەتدا سێ سیخوڕیان دەستگیركردووە، کە پیاوێک و دوو ژن بوون و لە بەرژەوەندیی تورکیا لە باکوور و خۆرهەڵاتی سوریا کاریان كردووە.
هەسەدە دەڵێت، ماوەیەکی زۆرە چاودێریی ئەو سێ کەسە دەكرێت و بەدواداچوونیان بۆ کراوە، دوای دەستگیرکردنیشیان، دانیان بە تاوانەکانیاندا ناوە.
هێزەكانی سوریای دیموکرات ئاشكراشیكردووە، ئەو سێ سیخوڕە دەستیان لە شەهیدکردنی سەوسەن بیرهات، جێگری مەزڵوم عەبدی فەرماندەی هەسەدە و ڕووبار حەسەکە و چەند فەرماندەیەکی دیكەی هەسەدەدا هەبووە.
بەڵگەنامەی سیخوڕی و تاوانەكانی سێ سیخوڕەكە کۆکراوەتەوە و ڕەوانەی دادگا دەکرێن، دوای ساغبوونەوەی تۆمەتەکان، بەپێی تاوانەکانیان سزا دەدرێن، وەك ئەوەی هەسەدە دەیڵێت.
