وەزارەتی ئەوقاف و كاروباری ئایینیی هەرێم لەسەر سووكایەتی كردن بە كاكەییەكان لە كەركوك هاتە دەنگ و ڕایدەگەیەنێت، “دەستبردن بۆ سیمبول و ڕەمزی هەر پێكهاتەیەك دەچێتە خانەی تاوانەوە و دەبێت بەپێی یاسا مامەڵەی لەگەڵدا بكرێت”.
بە پێی ڕاگەیەندراوێكی وەزارەتی ئەوقاف و كاروباری ئایینیی هەرێم تێیدا هاتووە، دوێنی لە شاری كەركوك و لە ڕووداوێكی بەئامانج و پلان بۆ داڕێژراودا، بێرێزیی بەرامبەر بە كەسێكی پێكھاتەی كاكەیی كراوە، كە لەھەمانكاتدا پێشمەرگەیە لە ھێزەكانی كوردستان، ئێمە لەوەزارەتی ئەوقاف و كاروباری ئایینی بە توندی سەركۆنەی ئەم بێڕێزییە دەكەین،
ئاماژە بەوەشكراوە، ئەو كردەوەيە يپێشهاتێكی ترسناكە لە ناوچە كوردستانیەكانی دەرەوەی ئیدارەی ھەرێمی كوردستان سەریهەڵداوە و تەواو پێچەوانەی گیانی تەبایی و پێكەوەژیانی ئایینی و پێكھاتەكانە لەھەرێمی كوردستان و دەستبردن بۆ سیمبلول و ڕەمزی ھەر پێكھاتەیەك دەچێتە خانەی تاوانەوە.
هەر لە ڕاگەیەندراوەكەدا هاتووە، “پێویستە حكومەتی عێراق بەپێی یاسا مامەڵە لەگەڵ ئەم دەستدرێژییانەدا بكات و بكەرانی بەسزای یاسایی خۆیان بگەیەنێت، تاوەكو ببێتە پەند بۆ ئەو كەسانەی دەیانەوێت سووكایەتی بەڕەمز و ھێما و پیرۆزەییەكانی ھەر پێكھاتەیەك بكەن”.
