تاقیگەی كۆنترۆڵی جۆریی بەرووبوومی كشتوكاڵی، هۆشداری دەدات لە مەترسیداریی بەرهەمی كشتوكاڵیی خۆماڵی و دەڵێت، “لە ئاستێكی مەترسیداردایە و شیاونییە بۆ خواردن”.
تاقیگەی كۆنترۆڵی جۆریی بەرووبوومی كشتوكاڵی لە عەلوەی سلێمانی ڕایگەیاند، بەرووبوومی كشتوكاڵیی خۆماڵی لە پشكنینە تاقیگەییەكان دەرنەچوون و شیاوی خواردن نین، چونكە زیان بە تەندروستیی مرۆڤ دەگەیەنن.
بەپێی ڕاگەیەندراوێكی تاقیگەكە، ساڵی ڕابردوو بەرهەمی جوتیاران هەناردەی ئیمارات كراون، بەڵام لەوێ بەهۆی خراپیی كوالێتی و دەرنەچوونیان لە پشكنین، هەموو بەرهەمەكان ڕەتكراونەتەوە و حكومەتی ئیمارات ڕێگەی نەداوە ببرێنە ناوخۆی وڵاتەكە.
تاقیگەی كۆنترۆڵی جۆریی بەرووبوومی كشتوكاڵی ئاشكرایكرد، بەرهەمی ناوخۆ ڕێژەیەكی زۆر ماددەی كیمیایی و دەرمانی قڕكەر لەخۆدەگرێت و كاریگەریی ڕاستەوخۆی لەسەر تەندروستیی هاوڵاتییان دەبێت.
ڕاگەیەندراوەكە ئاماژە بۆ ئەوە دەكات كە بەرووبوومی كشتوكاڵیی هەرێمی كوردستان لە خوارووی عێراقیش لە پشكنین دەرنەچوون و دەڵێت، “كۆمەڵێك چاوچنۆك و بازرگان دەیانەوێت بە ناوی جوتیارانەوە بەرهەمی نەشیاو و مەترسیدار دەرخواردی هاوڵاتییان بدەن”.
