محەمەد بازیانی وتەبێژی بزوتنەوەی ئیسلامی (باڵی کامیل حاجی عەلی) ڕایگەیاندووە، ئەوان هیچ باڵێکیان جیانەکردووەتەوە و بزوتنەوەی ئیسلامیی ڕەسەنن تەنها کامیل حاجی عەلی بە ڕابەری شەرعی دەزانن.
لە ڕوونکردنەوەیەکدا محەمەد بازیانی ڕایگەیاندووە، “ئێمە وەک بزوتنەوەی ئیسلامی هیچ باڵ و حزبێکمان لەناو بزوتنەوەی ئیسلامیدا ڕانەگەیاندوە و هەر خۆمان بە بزوتنەوەی ئسلامیی ڕەسەن دەزانین، تەنها بە شەرعی و بەپێویستمان زانیوە کە پشگیری لە بەڕێز کاک کامیلی حاجی عەلی بکەین و ئەو بە ڕابەری شەرعیی بزوتنەوەی ئیسلامی بزانین و دەزانین”.
سەبارەت بە جیابوونەوەیان دەڵێت، “ئەم هەنگاوەشمان تەنها بۆ بەرەوپێشبردنی بزوتنەوەی ئیسلامییە نەک هیچ مەبەستێکی تر کە وەک پڕوپاگەندەی خراپمان بۆ دادەتاشن و مەبەستمانە کە بزوتنەوەی ئیسلامی کار بە دین و شەریعەتی ئیسلام و قورئان بکات”.
سەبارەت بە بڕینی مووچەی ئەندامەکانیان ڕایگەیاندووە، ” هیچ کەس و لایەنگر و خانەنشین و پۆلیس و خوشکێکمان لێ زیاد نیە، بۆ هەر کاروبارێکی حکومی و کۆمەڵایەتی و خزمەتگوزارییەکانی وەک زەوی و زار، شەهیدان، پلە بەرز کردنەوە و گێڕانەوەی هەقی شەرعییان، ئێمە بە ئەرکی شەرعیی خۆمانی دەزانین هەوڵی بۆ بدەین، موچەی هیچ کەسێکیش نابڕدرێت بە دڵنیاییەوە”.
