وەزیری کشتوکاڵ و سەرچاوەکانی ئاو ڕایگەیاند، بازاڕەکانی ناوەڕاست و خوارووی عێراق بەڕووی بەرهەمی جوتیارانی هەرێم دەکرێنەوە.
بێگەرد تاڵەبانی، وەزیری کشتوکاڵی هەرێمی كوردستان لە هەژماری خۆی لە فەیسبووک بڵاویكردووەتەوە، دوابەدوای هەوڵەکانمان بۆ چارەسەرکردنی کێشەی ساغبوونەوەی بەرهەمی جوتیارانی ناوچەی پێنجوین و شارەکانی تری هەرێمی کوردستان، بەسوپاسەوە بۆ وەزارەتی کشتوکاڵی عێراق کە بڕیاریدا بە داخستنی مەرزەکانی بەرووی بەرهەمی هاوردەی ئەو بەروبوومانەی کە لە هەرێمی کوردستاندا بەڕێژەیەکی زۆر بەرهەمدەهێنرێن.
هەروەها کردنەوەی دەرگای بازاڕەکانی ناوەڕاست و خوارووی عێراق، بەمەبەستی ساغکردنەوەی بەرهەمی خۆماڵی جوتیاران كە ئەوانیش ( تەماتە، پەتاتە، باینجان،خەیار، شوتی و كاڵەك)ە.
