بەڕێوەبەرایەتیی کەشناسیی و بومەلەرزەزانیی هەرێم بڵاویکردەوە، ئەمشەو و سبەینێ ئەگەری بەفربارین لە سەنتەری هەردوو پارێزگای سلێمانی و دهۆک هەیە.
بەڕێوەبەرایەتیی کەشناسیی و بومەلەرزەزانی هەرێم بڵاویکردەوە، “ئەمڕۆ سێشەممە پێشبینی ھاتنی بارستە ھەوایەکی سارد لەگەڵ شەپۆلێکی بەفربارین لەسەر تەواوی ناوچە شاخاوییەکان دەکرێت، ئاسمان بە گشتی هەور دەبێت لەگەل نمە باران لە زۆربەی ناوچەکانی هەرێم و هەندێک جار ئاستى باران بارین دەگۆریت بۆ بارانى مامناوەند، پلەکانی گەرما نزم بوونەوەیەکی بەرچاو بەخۆیانەوە دەبینن لە (4-5) پلە بە بەراوورد بە تۆمارکراوەکانی دوێنێ”.
ئاماژەی بەوەش کرد، ” بەفربارین لە ناوچە شاخاوییەکاندا و لەو ناوچە شاخاوییانەى بەرزیەکەیان دەگاتە 1000م بەردەوام دەبێت، ئەگەرى بەفربارین لە سەنتەرى شارى سلێمانى و دهۆک بەشێوەى تێکەڵەى بەفر و باران دەبێت لە درەنگانى شەودا، لەگەڵ خۆڵبارین لە ناوچەکانى کەرکوک و گەرمیان کە تێکەڵى باران دەبێت”.
ئاشکراشیکرد، “ئاسمان بە گشتی هەور دەبێت لەگەڵ نمە باران لە زۆربەی ناوچەکانی هەرێم و بارینى بەفر لە ناوچە شاخاوییەکاندا بەردەوام دەبێت لە کاتەکانى بەیانى زوودا ئەگەرى بارینى بەفر لە سەنتەرى شارى سلێمانى و شارى دهۆک هەیە”.
