ژن و مێردێک لە شاری هەولێر دوای ئەوەی کێشە دەکەوێتە نێوانیان یەکتری بە چەقۆ دەکوژن، پۆلیسی هەولێر دەڵێت، لێکۆڵینەوە بۆ ڕاست و دروستیی ڕووداوەکە دەستیپێکردووە.
لە ڕاگەیەندراوێکدا بەڕێوەبەرایەتیی گشتیی پۆلیسی هەولێر ئاشکرایکردووە، ئەمڕۆ ئاگادارکراونەتەوە لە دوو تەرم لە کۆمەڵگای شاوێسی پارێزگای هەولێر.
پۆلیسی هەولێر ڕایگەیاندووە، کە ئەو دوو تەرمە ژن و مێردێک بوون و کێشە و ناکۆکی لەنێوانیاندا هەبووە، دوای ئەوەی بووە بە ناکۆکییان چەقۆیان لە یەکتری داوە، هەردووکیان لە شوێنی ڕووداوەکە گیانیان لەدەستداوە.
بەپێی ئەو ناسنامەیەی پۆلیسی هەولێر ئاشکرایکردووە، ئەو دوو هاوسەرە ناویان (نهاد سعید مصطفی) و (اخلاص فاضل خورشید)ـە.
پۆلیس ئاماژەی بەوەکردووە، لێکۆڵینەوەکان ئێستا سەرەتایین و بۆ گەیشتن بە ڕاست و دروستیی ڕووداوەکە و هۆکارەکەی لێکۆڵینەوەکان بەردەوام دەبن و تەرمەکانیان ڕەوانەی پزیشکی دادی هەولێر کراون.
