ئیدارەی نەتەوە یەکگرتووەکان بۆ کاروباری ئابوری و کۆمەڵایەتی ئاشکرایکردووە، ئەگەری هەیە لە مانگی تشرینی دووەمی داهاتوودا ژمارەی دانیشتووانی جیهان بگاتە 8 ملیار کەس.
نەتەوە یەکگرتووەکان لە دوایین پێشبینییدا بۆ دانیشتووانی جیهان ڕایگەیاندووە، بەپێی پێشبینییەکانیان لە 15ی تشرینی دووەمی ئەمساڵدا ژمارەی دانیشتووانی سەر گۆی زەوی دەگاتە 8 ملیار کەس، هەروەها پێشبینی دەکەن تا ساڵی 2023 هیندستان بکەوێتە پێش چینەوە لەڕووی زۆری ژمارەی دانیشتووانەوە .
ئەنتۆنیۆ گۆتێرێش لە ڕاگەیەندروێکدا دەڵێت، “پێشبینییەکانمان دەریدەخەن ژمارەی دانیشتووانی جیهان دەگاتە هەشت ملیار کەس، ئیتر کاتی ئەوەیە بەرپرسیاربین بەرامبەر هەسارەکەمان، ساتی بیرکردنەوە و پابەندبوونمانە بە پاراستنیەوە کە تائێستا ڕێزمان لێنەگرتووە”.
گۆتێرێش هەروەها دەڵێت، “دەبێت شانازی بە هەمەجۆریمانەوە بکەین، دانبنێین بە مرۆڤایەتیماندا پێکەوە، هەروەها ئەمە نیشانی دەدات کە پێشکەوتنە تەندروستییەکان تەمەنیان درێژکردووە و مردنی دایک و منداڵی کەمکردووەتەوە”.
بەپێی ئیدارەی نەتەوە یەکگرتووەکان بۆ کاروباری ئابوری و کۆمەڵایەتی، گەشەی دانیشتووان لە خێراترین ئاستدایە، ئاماژە بەوەدەکات لە ساڵی 2030دا ژمارەی دانیشتووان دەگاتە 8.5 ملیار کەس، لە 2050 دەگاتە 9.7 ملیار، هەروەها لە ساڵی 2080 دەگاتە لوتکە و دەبێتە 10.4 ملیار کەس لەو ڕێژەیەدا دەمێنێتەوە تا ساڵی 2100.
بەرزترین ئاستی زۆربوون لە ساڵانی ڕابردوودا لە کۆماری کۆنگۆ، ئەسیوپیا، هیندستان، نەیجیریا و پاکستان بووە.
بەپێی خشتەی نەتەوە یەکگرتووەکان لە ساڵی 1987 تاوەکو 1999 ژمارەی دانیشتووان تەنها یەک ملیار زیادیکردووە و لە پێنج ملیارەوە گەیشتووەتە شەش ملیار، لە ساڵی 2011 ژمارەی دانیشتووانی گۆی زەوی گەیشتووەتە حەوت ملیار کەس.
