بەرپرسانی فەرەنسا رایانگەیاند، فڕۆکەیەکی ئایرۆباتیکی بچووک ئەمڕۆ هەینی لە میانی نمایشێکی ئاسمانیدا لە کەناراوەکانی باشووری رۆژهەڵاتی فەرەنسا کەوتەخوارەوە و فڕۆکەوانەکەی نەیتوانی خۆی رزگاربکات.
وتەبێژی هێزی ئاسمانیی فەرەنسا بە ئاژانسی فرانس پرێسی وتووە، فڕۆکەی فۆگا ماجیستەر لە شاری لو لاڤاندۆ نمایشی دەکرد و ئەو فڕۆکەیە، لە دوای جەنگی جیهانی دووەم دروستکراوە، بۆ چەندین ساڵ لەلایەن سوپای فەرەنساوە وەکو فڕۆکەی راهێنەری و فڕۆکەی ئایرۆباتیک بەکاردەهێنرا، کەوتەخوارەوە و فڕۆکەوانەکەی گیانیلەدەستدا.
بەرپرسانی پارێزگاکە دەڵێن، “ئۆپەراسیۆنێکی فریاگوزاری بەخێرایی ئەنجامدرا و تەرمی فڕۆکەوانە تەمەن 65 ساڵانەکە دۆزرایەوە.
بەرپرسانی نمایشەکە رایانگەیاند، دوای رووداوەکە، نمایشەکە راگیرا و کەوتنەخوارەوەی فڕۆکەکە وەک باری لەناکاو هەژمارکرا.
