بەڕێوەبەری نەخۆشخانەی منداڵانی سلێمانی ڕایگەیاند، کۆرۆنا لەناو منداڵاندا بڵاوبووەتەوە و ئێستا بەرەو لوتکەی نەخۆشییەکە دەچین.
لە لێدوانێکدا بۆ تۆڕی میدیایی ئێستا دکتۆر پشدەر عەبدوڵڵا بەڕێوەبەری نەخۆشخانەی شەهید جەمال ئەحمەد ڕەشیدی منداڵان لە سلێمانی ڕایگەیاند، دوو هەفتە پیشتر مەترسیی هەڵکشانی تووشبووانی منداڵان بە کۆرۆنا ڕاگەیەندرابوو، “ئێستا گەیشتووینەتە ئەو ئەو ئاستە و نەخۆشییەکە لەناو منداڵاندا بەرەو لوتکە دەچێت”.
بەپێی دکتۆر پشدەر عەبدوڵڵا، ئێستا ژمارەیەکی زۆر منداڵ تووشی کۆرۆنا بوون و هەندێکیان حاڵەتی قورسیان هەیە، بەڵام تا ئێستا هیچ حاڵەتێک نییە کە مەترسیی گیانلەدەستدانی هەبێت.
ئاماژەی بەوەشکردووە، کە زۆرینەی ئەو منداڵانەی ئێستا سەردانی نەخۆشخانە دەکەن تووشبووی کۆرۆنان و بەشێکیشیان تووشبووی سکچوون و ڕشانەوەن کە هێشتا ماوە لەناو منداڵاندا.
داواشدەکات، ئەوانەی تەمەنیان لە 12 ساڵ بەسەرەوەیە ڤاکسین وەربگرن و ئەوانەشی نەخۆشیی درێژخایەنیان هەیە خۆپارێزیی تەواوبکەن.
