بەڕێوەبەرایەتیی چاکسازیی ژنان و منداڵانی سلێمانی، ئەمڕۆ پێنجشەممە خشتەی سەردانکردنی ژنان و منداڵانی سزادرا و ڕاگیراوی لە ڕۆژانی جەژندا بڵاوکردەوە، بەپێی خشتەکە لە یەکەم ڕۆژدا ڕێگە بە هیچ سەردانکردنێک نادرێت.
لە ڕاگەیەندراوی بەڕێوەبەرایەتیی چاکسازیی ژنان و منداڵانی سلێمانیدا هاتووە، یەکەم ڕۆژی جەژن تایبەت دەبێت بە بەڕێوەچوونی مەراسیمی جەژن و جەژنە پیرۆزە لەناو سزادراوان خۆیاندا لەگەڵ پەیوەندیی تەلەفۆنی سزادراوان بەکەسوکاریانەوە، ڕێگە بە هیچ سەردانکردنێک نادرێت.
خشتەی ڕۆژانی جەژنی چاکسازییەکە بەمشێوەیەیە:
1- یەکەم ڕۆژی جەژن تایبەت دەبێت بە بەڕێوەچوونی مەراسیمی جەژن و جەژنە پیرۆزە لەناو سزادراوان خۆیاندا، لەگەڵ پەیوەندیی تەلەفۆنی سزادراوان بەکەسوکار و دوور وڵاتانیان بەمەبەستی جەژنە پیرۆزە، لەم ڕۆژەدا هیچ جۆرە سەردانێک بەگشتی و بەتایبەتی بۆ هیچ کەسێک ناکرێت .
2- دووەم ڕۆژی جەژن، ڕۆژی یەک شەممە ڕێکەوتی ( 10/7/2022 ) سەردانیکردن تەنها بۆ لای سزادراوانی ژنان دەبێت .
3- سێیەم ڕۆژی جەژن، ڕۆژی دوو شەممە ڕێکەوتی ( 11/7/2022 ) سەردانیکردن تەنها بۆ لای منداڵانی دانراو و ڕاگیراو دەبێت .
4- کاتی سەردانکردن لەکاتژمێر ( 9:00 ) بەیانی تا ( 12:30 ) نیوەڕۆ دەبێت .
5- سەردانکردن تەنها بۆ کەسانی پلەیەک و نزیک لە سزادراوان و دانراوان و ڕاگیراوان دەبێت ( دایک – باوک – خوشک – برا – کوڕ – کچ – مام – خاڵ – پوور – برازا – خوشکەزا – داپیرە – باپیرە ) . بەدەر لەم کەسانە سەردانکردن بۆ هیچ کەسێکی تر ناکرێت .
6- سەردانیکەر لەکاتی سەرداندا ناسنامەی باری کەسێتی یان کارتی نیشتمانی یان هەر بەڵگەنامەیەکی تری فەرمیی پێبێت، کە جۆری ئەم خزمایەتییە پێناسە بکات، ئەگەرنا ڕێگە بەسەردانیکار نادرێت کە سەردانەکەی بکات .
