پەیامنێرێکی باوەڕپێکراوی یانەی چێڵسی، هۆکاری تێکچوونی پەیوەندیی نێوان ڕۆمێلو لوکاکوی بەلجیکی و تۆماس توخێلی ڕاهێنەری ئەڵمانی ئاشکرا کرد.
بە وتەی نیزار کینیسلای پەیامنێری فەرمی و باوەڕپێکراوی یانەی چێڵسی بۆ پۆدکاستی “ئیتاڵی فووتبۆڵ”، تۆماس توخێل گاڵتە و گەپێکی لەگەڵ لوکاکو کردووە، بەڵام یاریزانەکە بە شێوەیەکی هەڵە لێی تێگەیشتووە و بەو هۆیەوە پەیوەندی نێوانیان تێکچووە.
کینیسلا دەڵێت، “یەکێک لە ناوخۆی یانە بۆی گێڕامەوە، لە کاتێکدا تۆماس توخێل سەیری یارییەکی خولی نایابی ئینگلیزی کردووە، بە لوکاکوی وتووە، سەیرکە ئەوە باوکتە، مەبەستی لە ئەنتۆنیۆ کۆنتیی ڕاهێنەری یانەی تۆتنهام بووە.”
هەروەها دەڵێت، “ئەوەی توخێل وتی گاڵتە و گەپ بوو، بەڵام بەلای لوکاکوەوە باش نەبوو.”
بە وتەی پەیامنێرەکە، ئەم ڕووداوە بەر لە تێکچوونی پەیوەندییەکان ڕوویداوە و هۆکار بووە بۆ جیابوونەوەی ڕاهێنەر و یاریزانەکە.
