مستەفا كازمی سەرۆك وەزیرانی عێراق لە جەددەی پایتەختی ئابوريى سعودیەوە گەیشتە تارانی پایتەختی ئێران.
نوسینگەی سەرۆك وەزیران سەردانەكەی بە فەرمی ناوبرد و ئاشكرایكرد پاش كۆتاییهاتنی سەردانەكەی بووە بۆ سعودیە دوای ئەوەی لەكاتێكی درەنگی دوێنێ گەیشتە جەددە.
لە سعودیە مستەفا كازمی لەگەڵ محەمەد بن سەلمان شازادەی جێنشین كۆبووەوە و پەیوەندییەكان و دۆسیە هاوبەشەكان تاوتوێكران.
بەر لە جێهێشتنی ئەو وڵاتەش سەرۆك وەزیران و تیمی یاوەری ڕێوڕەسمی عومرەیان بەجێهێنا.
دەربارەی سەردانەكەی بۆ تاران، ئەمیر موسەوی دیپلۆماتكاری پێشووی ئێران لە تویتێكدا ڕایگەیاند، سەرۆك وەزیران چەند دۆسیەیەكی گرنگی هەڵگرتووە، لەوانەش دۆسیەی ئاساییكردنەوەی پەیوەندییەكانی نێوان تاران و ڕیاز، جگە لە چوار دۆسیەی دیكە.
دیپلۆماتكارەكە ناوەرۆكی ئەو دۆسیانەی دیكەی ئاشكرانەكرد.
