وەزارەتی سەرچاوەكانی ئاوی عێراق، لەبارەی ئاوەوە دڵنیاییدەدات و دەڵێت، ئەو قسەیە لە ڕاستییەوە دوورە كە دەوترێت دیجلە و فورات وشكدەكەن.
عەون زیاب ڕاوێژكاری وەزیری سەرچاوەكانی ئاو ڕایگەیاند، چەندین لایەن هەوڵدەدەن بابەتی ئاو لە عێراق گەورەبكەن و ئامانجیان ترساندنی هاوڵاتییانە، كەمبوونەوەی ئاو ڕوونە و بەردەوام ڕووبەڕوومان دەبێتەوە، بەڵام ئەوە ڕاستنییە كە دەوترێت دوای چەند ساڵێك عێراق ڕووبارەكانی لەدەستدەدات و وشكدەكەن.
ڕاوێژكارەكەی وەزیری سەرچاوەكانی ئاو دەڵێت، “دوای تەواوبوونی بەنداوەكانی توركیا و سوریا و ئێران، زیاتر هەست بە كەمئاویی دەكەین، سوریا بەهۆی جەنگەوە پڕۆژەكانی ڕاگرتووە، بەڵام توركیا بەردەوامە لە دروستكردنی بەنداو و دوای تەواوبوونی ئەو پڕۆژانە، گرفتی كەمئاوی گەورەتر دەبێت”.
ماوەیەكە شارەزایانی ژینگە و ڕێكخراوە عێراقی و نێودەوڵەتییەكان، پێشبینیدەكەن بەهۆی كەمیی بارانبارین و گرتنەوەی ئاو لەلایەن توركیا و ئێرانەوە، هەردوو ڕووباری دیجلە و فورات وشكبكەن. ئێستا ئاستی ئاوی هەردوو ڕووبارەكە زۆر دابەزیوە، هەردوو دەریاچەی حەمرین و ساوە-ش بە تەواوەتیی وشكبوون.
