یانەی لیڤەرپوڵ ئامادەکاری دەکات بۆ پێشکەشکردنی گرێبەستێکی خەیاڵی بە یانەی بەنفیکا، تایبەت بە گواستنەوەی داروین نونێز.
هاوکات لەگەڵ بەهێزبوونی ئەگەرەکانی ڕۆیشتنی سادیۆ مانێ لە ئەنفێڵدەوە بۆ یانەی بایرن میونشن، ئیدارەی لیڤەرپوڵ بەدوای جێگرەوەیەکدا دەگەڕێن و سەرنجیان خستووەتە سەر داروین نونێزی ئۆرۆگوایی.
ڕۆژنامەی دەیلی مەیلی بەریتانی و ڕیکۆردی پۆرتوگالی بڵاویانکردەوە، سەرەڕای هەوڵەکانی مانچستەر یونایتد بۆ هەمان مەبەست، بەڵام لیڤەرپوڵ لەسەر ڕاسپاردەی یۆرگن کلۆپ بڕیاریداوە بە هەر شێوەیەک بێت گرێبەست لەگەڵ نونێز واژۆ بکات، ئامادەییشیان دەربڕیوە گرێبەستێکی پێوانەیی بە بڕی 85 ملیۆن پاوەند پێشکەشی بەنفیکا بکەن.
جولیان وارد، بەڕێوەبەری وەرزشیی لیڤەرپوڵ لەگەڵ بەنفیکا دەستی بە دانوستاندن کردووە و یاریزانەکەش ئارەزووی یاریکردن دەکات لە مێرسیساید.
