وەزارەتی دەرەوەی ڕوسیا ڕایگەیاند، وڵاتەكەی سزای تایبەتی بەسەر 61 بەرپرسی ئەمریکادا سەپاندووە، كە وەزیری خەزێنەی ئەو وڵاتە و ژمارەیەك بەرپرسی دیكەی تێدایە.
بەپێی ڕاگەیەندراوێكی وەزارەتی دەرەوەی ڕوسیا، سزای تایبەتییان سەپاندووە بەسەر ئەو بەرپرسانەی ئەمریکا و یەکێکیش لە سزاکان ئەوەیە ڕێگەیان پێنادرێت بێنە ناو ڕوسیاوە.
بڕیارەکەی مۆسکۆ، “وەکو تۆڵەسەندنەوەیەکە لەسەر ئەوەی ئەمریکا بەردەوامە لە فراوانکردنی سزاکانی دژ بە کەسایەتییە سیاسی و گشتیی خاوەنکارە ناوخۆییەکانی ڕوسیادا.”
هەر بەپێی ڕاگەیەندراوەكە، ئەو کەس و لایەنانەی کە سزاکان دەیانگرێتەوە وەزیری خەزێنەی ئەمریكا و بەرپرسانی باڵای سەربازی و ڕاگەیاندنەکان و دەزگاکانی هەڵسەنگاندن و کۆمپانیاکانی فڕۆکە و دروستکردنی کەشتی دەگرنەوە.
هەروەها ئەو بەرپرسانەی وەزارەتی دەرەوەی ئەمریکاش دەگرنەوە کە دەستیان هەبووە لە بڵاوکردنەوەی “ڕاپۆرتی هەڵە سەبارەت بە هێرشە ئەلیکترۆنییەکانی ڕوسیا.”
