هەژاری تەنگی بە بەشێكی گەورەی كۆمەڵگەی عێراقی هەڵچنیوە، 11 ملیۆن كەس لەژێر هێڵی هەژارییەوەن و حكومەت دەڵێت، تاوان زۆربووە.
ئامارەكە وەزارەتی كار و كاروباری كۆمەڵایەتیی عێراق ئەمڕۆ شەممە ئاشكرایكردووە، هۆشداری دەدات لە هەڵكشانی دیاردەی توندوتیژیی خێزانی لەناو توێژی هەژاراندا.
ئەسیل حەسەن بەرپرسی بەشی خزمەتگوزاریی كۆمەڵایەتی لە وەزارەتەكە ڕایگەیاند، ماوەی دوو ساڵە ڕێژەیەكی بەرزتری توندوتیژیی خێزانی تۆماردەكەن، ئەوەش بەهۆی بڵاوبوونەوەی هەژاری و خراپیی بژێویی خێزانە كەمدەرامەتەكانەوەیە.
كاربەدەستەكەی وەزارەتی كار و كاروباری كۆمەڵایەتی دەڵێت، 11 ملیۆنی عێراقی لەژێر هێڵی هەژارییەوەن و ئەوەش هۆكارە بۆ زۆربوونی تاوان و توندوتیژی، تەنانەت لەناو ئەو خێزانانەدا كە سوودمەندن لە مووچەی تۆڕی پاراستنی خێزان و باری داراییان لە ئاستی پێویستدا نییە.
