بڕیارە ڕۆژی شەممە دیداری یەكێتیی نیشتمانیی كوردستان لە سلێمانی بەڕێوەبچێت، كە حزبەكە بە هۆكارێكی گرنگ بۆ بەهێزكردنی خواستی چاكسازی لە دامەزراوە و ئۆرگانەكانی خۆی و دووبارە داڕشتنەوەی سیاسەتەكانی ناویدەبات.
دوای ئەوەی لە ماوەكانی ڕابردوودا كۆنفرانسی دیداری یەكێتی لە دهۆك، هەولێر، كەركوك، گەرمیان، هەڵەبجە و شارەزوور، ڕاپەرین، بەغداد، خانەقین و سلێمانی بە مەبەستی گوێگرتن و وەرگرتنی پێشنیاز و ڕەخنەكانی ئەندام و كادر و لایەنگرانی یەكێتی بەڕێوەچوو، بڕیارە سبەینێ دیداری ئەو حزبە لە سلێمانی ڕێكبخرێت.
بەپێی میدیای فەرمیی یەكێتیی نیشتمانیی كوردستان، دیداری یەكێتی هەوڵێكە بۆ نوێكردنەوەی توانا حزبییەكان بۆ خزمەتی كۆمەڵانی خەڵكی كوردستان و هۆكارێكی گرنگە بۆ بەهێزكردنی خواستی چاكسازی لە دامەزراوە و ئۆرگانەكانی حزب و دووبارە داڕشتنەوەی سیاسەت و دیدگای یەكێتی بۆ كۆی پرسەكان”.
یەكێتی لەبارەی “دیدار”ـەكەیەوە دەڵێت، “ئەم دیدارە بانگەوازێكی هەڤاڵانە و نیشتمانییانەیە بۆ تاوتوێكردنی واقعی ئێستای یەكێتی و ناسنامەكەی، بۆ نوێكردنەوەی گوتاری سیاسی و كۆمەڵایەتی و گەشەپێدانییەتی، بۆ ئەوەی بە دیدگایەكی نوێوە ئامادەبێت ئەركەكانی سەرشانی جێبەجێبكات و سەرئەنجام باشتر خزمەتی كۆمەڵانی خەڵك و خاكی كوردستان بكات، بۆ سبەینێیەكی باشتر، كوردستانێكی ئاوەدان بۆ هەمووان بێجیاوازی، فەراهەمبكات”.
