لە شاری هەولێر، دانیشتووانی گەڕەکی هەولێری نوێ دوچاری کەمئاوی بوون و ماوەی هەفتەیەکە بە تانکەر ئاو دەکڕن، لە کاتێکدا ئەمە یەکەمجار نییە کێشەی کەمئاوی ڕوو لەو شارە بکات.
یەکێک لە دانیشتووانی گەڕەکی هەولێری نوێ بە تۆڕی میدیایی ئێستای ڕاگەیاند، ماوەی هەفتەیەکە بێئاوی ڕووی لە گەڕەکەکەیان کردووە، ئاو لە ماڵەکانیاندا نەماوە و لە ئێستادا بە تانکەر ئاو دەکڕن.
هاوڵاتییەکە وتیشی، “چەند جارێک پەیوەندییان بە لایەنە پەیوەندیدارەکانەوە کردووە، “بەڵام لایەنەکان نە بەدەم داواکارییەکانیانەوە هاتوون و نە ئامادەشبوون هۆکاری بێئاوییەکەیان بۆ ڕوونبکەنەوە”.
ئەمە یەکەمجار نییە لە هەولێر کێشەی کەمیی ئاو سەرهەڵبدات. لە ساڵی ڕابردوودا بەشیکی زۆری گەڕەکەکانی هاولێر بێئاو بوون و نرخی تانکەرێک ئاو گەیشتە 250 هەزار دیناری عێراقی.
ئەمساڵیش بەهۆی وشکەساڵییەوە، پێشبینیدەکرێت دیسانەوە بەشێکی تری گەڕەکەکانی هەولێر ڕووبەڕووی بێئاوی ببنەوە.
