ڕۆمانی “جەمشیدخانی مامم” لە ڕیزی باشترین 11 کتێبی لیستی ORFـی نەمسادایە.
لە لیستی باشترین 11 کتێبی 2022ـی “کۆمپانیای پەخشی نەمسایی – ORF”ـدا، کە تێیدا ساڵانە لەلایەن چەندین نووسەر و ڕەخنەگری ئەدەبیی سەربەخۆوە، باشترین کتێبەکانی نووسەرانی جیهان هەڵدەبژێردرێن، وەرگێڕانە ئەڵمانییەکەی ڕۆمانی “جەمشیدخانی مامم کە هەمیشە با لەگەڵ خۆیدا دەیبرد”ـی بەختیار عەلی، نووسەر و ڕۆشنبیری کورد هەیە.
لیستەکەی ORF تایبەتە بەو کتێبانەی کە تازە بڵاوکراونەتەوە، بۆیە کتێبی نووسەرانی هاوچەرخ و ئەو نووسەرە کۆچکردووانەش لەخۆدەگرێت، کە لە ماوەی نزیکدا کتێبەکەیان چاپی نوێی لێبڵاوکراوەتەوە.
جێی ئاماژەیە، لە هەمان ئەو لیستەی ڕۆمانە کوردییەکەی تێدایە، کتێبی هەریەک لە “عەبدولڕەزاق گورنە” و “هێرتا میولەر” هەن، کە هەردووکیان براوەی خەڵاتی نۆبڵن.
لە پاڵ ئەماندا، کتێبی هەریەک لە “سیمۆن دی بوڤوار” و “پیر پاولۆ پازۆلینی” دەبینرێت، کە یەکەمیان بیرمەندێکی بەناوبانگی فەرەنسی بووە و دووەمیشیان یەکێکبووە لە فیلمساز و نووسەرە هەرە دیارەکان.
