بەنداوی دەربەندیخان فریای دەریاچەی حەمرین دەكەوێت و لە وشكبوونەوەی تەواوەتی ڕزگاریدەكات، بەوەش سەدان هەزار كەس لێی سوودمەند دەبن.
دوای وشكبوونی دەریاچەی حەمرین و زەرەمەندبوونی سەدان هەزار كەس لە ناوچەكانی حەوزی حەمرین و دیالە، ئاوی بەنداوی دەربەندیخان بەردەدرێتەوە و دەریاچەكە دەبووژێنێتەوە.
وشكبوونەوەی دەریاچەی حەمرین كە بەهۆی وشكەساڵی و گرتنەوەی ئاو لەلایەن ئێرانەوەیە، ژیانی بەشێك لە دانیشتووانی ناوچەكەی خستووەتە مەترسییەوە، وەزارەتی سەرچاوەكانی ئاوی عێراق دەڵێت، بەمنزیكانە ئاوی بەنداوی دەربەندیخان بەردەدرێتەوە و ئاو دەگات بە دەریاچەی حەمرین و دووبارە دەبووژێتەوە.
عەون زیاب ڕاوێژكاری وەزارەتی سەرچاوەكانی ئاوی عێراق ئەمڕۆ سێشەممە ڕایگەیاند، تەنها 134 ملیۆن مەتر سێجا ئاو لە دەریاچەكەدا ماوە و لە وشكبوونەوەی تەواوەتی نزیكبووەتەوە، بەڵام بەردانەوەی ئاوی بەنداوی دەربەندیخان كە ئامانج لێی بەرهەمهێنانی كارەبایە لە وەرزی هاویندا، دەریاچەی حەمرین دەبووژێنێتەوە و ئاستی ئاوی دەریاچەكە بەرزدەبێتەوە.
