قەدەغەی راوکردنی ماسی لە هەرێم کۆتایی دێت، بەڕێوەبەری سامانی ماسییش دەڵێت تا ئێستا نەگەیشتووینەتە ئاستی خۆبژێوی و پشت بە هاوردەکردن دەبەستین.
ئەمڕۆ 20ی حوزەیرانی 2024 ماوەی قەدەغەکردنی راوەماسی لە هەرێمی کوردستان کۆتایی دێت.
بێستون نەجمەدین، بەڕێوەبەری سامانی ماسی لە وەزارەتی کشتوکاڵ و سەرچاوە ئاوییەکانی هەرێم لە دیدارێکی تەلەفزیۆنیدا رایگەیاند، بەرهەمی ماسی لە ئەمساڵدا زیادیکردووە و ئێستا نزیکەی 413 پرۆژەی بەخێوکردنی ماسی لە هەرێم مۆڵەتیان هەیە، بەرهەمی ساڵانەیان نزیکەی سێ هەزار و 500 تۆن ماسییە.
بەپێی وتەی بێستون نەجمەدین، چەند پرۆژەیەکی ماسی هەن کە مۆڵەتیان نییە و ئێستا لیژنەیەک سەرقاڵی کۆکردنەوەی ئاماری ئەو پرۆژانەیە و لە داهاتوویەکی نزیکدا بڕیار لە چارەنووسیان دەدرێت.
ئاماژەی بەوەش کرد، ئەو بەرهەمی ماسییەی لە هەرێم هەیە پێداویستی ناوخۆ پڕناکاتەوە و تا ئێستا نەگەیشتووین بە ئاستی خۆبژێوی، بەڕێژەی زیاترلە %50 پشت بە هاوردەکردن دەبەستین لە وڵاتانی دراوسێ و شارەکانی ناوەراست و باشووری عێراق.
رۆژی 5ی ئازاری 2024 قەدەغەی راوەماسی لەهەرێمی کوردستان دەستیپێکرد.
