لە ماوەی پێنج ڕۆژی ڕابروودا، هەشت كەس لە هەولێر و دهۆك و ناوچە كوردستانییەكانی نێوان دهۆك و موسڵ كوژراون كە پێنجیان لە یەك ڕووداوی تەقەكردندا بوونە قوربانی.
دوێنێ هەینی لە گوندی كەورەبەن-ی سنووری پارێزگای هەولێر لە ڕووداوێكی تەقەكردندا پێنج كەس كوژران. شەڕەكە بەهۆی كێشەی كۆمەڵایەتیی كۆن و زەویوزارەوە هەڵگیرسا و چوار ئەندامی یەك خێزان كە باوكێك و سێ كوڕەكەی بوون، لەگەڵ ئامۆزایەكیاندا كوژران.
پێش ئەم ڕووداوە و لە ماوەی دوو ڕۆژدا دوو ژن لە هەولێر و دهۆك لەلایەن هاوسەرەكانیانەوە كوژرابوون و ژنەكەی دهۆك بە وایەر لەلایەن هاوسەرەكەیەوە خنكێندرابوو.
ڕۆژی 11ی ئەم مانگەش تەرمی گەنجێكی تەمەن 17 ساڵ بە سەربڕدراوی لە ناحیەی باشیك-ی سەر بە قەزای شێخان دۆزرایەوە و تا ئێستا كەس بە تۆمەتی كوشتنی دەستگیرنەكراوە.
