بەدواداچوونێك ئاشكرایكردووە، هەشت هەزار چەكداری داعش لە عێراقدا ماون و نیوەیان شانەی نووستوون و لەناو كۆمەڵگەدا خۆیان حەشارداوە.
بەدواداچوونەكە ماڵپەڕی ئۆراسیا كردوویەتی و هۆشداری دەدات لە خۆڕێكخستنەوەی داعش لە عێراق و كۆكردنەوەی هێزەكانی و دەڵێت، داعش سەرگەرمی خۆڕێكخستنەوەیە و لە ڕێگەی پێكهێنانی گروپی بچووكی گەڕۆكەوە چالاكییەكانی ئەنجامدەدات.
ئاشكرایكردووە، ڕێكخراوی داعش شانە نووستووەكان و شانەی بچووكی چەكدار بەكاردەهێنێت بۆ هێرشكردن و پەلاماردان و بۆ جێبەجێكردنی پلانەكەشی، زیاتر ناوچە سوننەنشینەكان دەقۆزێتەوە كە هێشتا گرفتی ئەمنی و كارگێڕییان هەیە.
ئۆراسیا یەكێك لەو پارێزگایانە ئاشكرادەكات كە دیالەیە و دەڵێت، داعش پەرە بە شانە نووستووەكانی لە دیالە دەدات، چونكە پارێزگاكانی سلێمانی، كەركوك، سەڵاحەدین، نەینەوا، ئەنبار و واست پێكەوە دەبەستێتەوە و لە ڕووی هەڵكەوتەی جوگرافیشەوە یارمەتیدەرە بەو پێیەی چەندین گرد و دۆڵ و ناوچەی سەخت لەخۆدەگرێت.
بەپێی بەدواداچوونەكە، تا ئێستا هەشت هەزار چەكداری داعش لە عێراقدا ماون كە نیوەی ئەو ژمارەیە شانەی نووستوون و لەناو كۆمەڵگەدا بڵاوبوونەتەوە و لێرە و لەوێ خۆیان حەشارداوە.
