شەڕی نێوان گەریلاكانی پەكەكە و سەربازانی سوپای توركیا بەردەوامە و كوژرانی 34 سەربازی دیكە لە زاپ و ئاڤاشین ڕاگەیەنرا.
ناوه‌ندی ڕاگه‌یاندن و چاپه‌مه‌نیی هێزەکانی پاراستنی گەل (هه‌په‌گه) بڵاویكردەوە، چالاكی گەریلا له چێوه‌ی هه‌ڵمه‌تی شۆڕشگێڕیی (بازه‌كانی زاگرۆس) له ناوچەکانی زاپ و ئاڤاشین دژی هێرشە داگیرکارییەکانی دەوڵەتی تورکیا بەردەوامە.
دەشڵێت، لە بەرخۆدانی 24 کاتژمێری ڕابردوودا 34 سەربازی تورکیا لە زاپ و ئاڤاشین کوژراون و شەش سەربازیش برینداربوون.
بەپێی ڕاگەیەنراوەكە گورزیش لە فڕۆکەیەکی بێفڕۆکەوانی توركی وەشێندراوە.
دوێنێش میدیای پەكەكە بڵاویكردەوە، لە دوو ڕۆژی ڕابردووی هێرشەكانی توركیا 44 سەربازی ئەو وڵاتە كوژراون كە شەشیان پلەداری باڵان، جگە لە برینداربوونی 32 سەربازی دیكە.
بەرەبەیانی دووشەممە 18ی ئەم مانگە ئۆپەراسیۆنی کلیل چنگ-ی هێزەكانی توركیا لە هەرێمی کوردستان دژی پەکەکە دەستیپێكرد.
