توێژینەوەیەک دەریخستووە، میهرەبانیی مرۆڤ تەنها کاریگەری لەسەر کەسی بەرامبەر دانانێت، بەڵکو دەکرێت کاریگەریی ئەرێنیی هەبێت لەسەر تەندوستیی مێشک لای سەرجەم ئەندامانی خێزان.
بەپێی “medicalxpress”، تیمێک لە توێژەر و پزیشکانی سەنتەری “تەندروستیی مێشک” لە زانکۆی تێکساس لێکۆڵینەوەیان لەسەر ڕۆڵی میهرەبانی و هاوسۆزیکردووە لە تۆڕی ئینتەرنێتدا، کە داخۆ چ کاریگەرییەکی ئەرێنیی دەبێت لەسەر هەڵسوکەوتە کۆمەڵایەتییەکان بەر لە دەستپێکردنەوەی قوتابخانە و بارودۆخی دایک و باوکان لە میانی بڵاوبوونەوەی کۆرۆنادا.
لێکۆڵینەوەکە لەڕێی پرۆگرامێکی ڕاهێنانەوە بووە بە ناوی “Kind Minds with Moozie” و لە ڕێبازێکی پەروەردەییەوە وەرگیراوە دامەزرێنراو لەلایەن تێد درێد-ەوە.
لەم لێکۆڵینەوەیەدا 38 خێزان و منداڵەکانیان، کە تەمەنیان لە نێوان 3 بۆ 5 ساڵان بووە، بە نمونە وەرگیراون و باسی چەند ڕاهێنانێکیان بۆ کراوە کە لەڕێیەوە دایک و باوکان دەتوانن لەگەڵ منداڵەکانیاندا ئەنجامیانبدەن، تاکو فێری میهرەبانییان بکەن.
ڕاپۆرتەکانی تیمەکە سەبارەت بە منداڵەکان دەریانخستووە، منداڵان پاش ئەم پرۆگرامە میهرەبانترن، هەروەها ئەنجامەکان دەریدەخەن میهرەبانی کاریگەریی ئەرێنیی هەیە لەسەر ژیری و تەندروستیی گشتیی مێشک.
جوولی فراتانتۆنی پزیشک و بەڕێوەبەری پرۆژەی تەندروستیی مێشک ڕایگەیاندووە، “دایک و باوک دەتوانن لە ماڵەکانی خۆیانەوە چەند ڕێگایەکی ئاسان فێرببن بۆ میهرەبانبوون، تاکو ژینگەیەکی تەندروست بۆ مێشکی منداڵەکانیان فەراهەم بکەن”.
هەروەها ڕوونیکردووەتەوە، “لە کاتی شڵەژان و سەختیدا، بەسەربردنی هەندێک کات و میهرەبانبوون لەگەڵ خۆتدا دەکرێت نەرمی و هەڵسوکەوتت لەگەڵ منداڵەکەشتدا باشتربکات. گرنگیی میهرەبانی بە کەم مەزانە، چونکە لە کۆتاییدا دەکرێت تەندروستیی مێشک دیاریبکات”.
