پۆلیسی کەرکوک دەستگیرکردنی بکوژی ئەو ئەندامەی یەکێتیی نیشتمانیی کوردستانی ڕاگەیاند، کە پێشتر لە گەڕەکی پەنجە عەلی لە کەرکوک لەلایەن چەند کەسێکی نەناسراوەوە کوژرا.
لە ڕاگەیەندراوێکدا بەڕێوەبەرایەتیی گشتیی پۆلیسی کەرکوک ڕایگەیاند، بکوژی ئەو ئەندامەی یەکێتی بەناوی “ڕێبوار محەممەد ئەمین” کە لە گەڕەکی پەنجا عەلی لەلایەن چەند کەسێکی نەناسراوەوە کوژرا دەستگیرکراوە.
بکوژەکە دوای ئەوەی بە گومانی تێوەگلانی لە کوشتنی ئەو ئەندامەی یەکێتی، دەستگیرکراوە و لێکۆڵینەوەی لەگەڵدا کراوە، بەپێی پۆلیسی کەرکوک دوای خستنەڕووی بەڵگەکان دانیناوە بە ئەنجامدانی تاوانەکەدا.
تۆمەتبارەکە هۆکاری ئەنجامدانی ئەو تاوانەی بۆ تۆڵەسەندنەوە بەهۆی کێشەیەکی خێزانییەوە گێڕاوەتەوە، پۆلیسی کەرکوک توانیویەتی هاوکارەکەشی دەستگیربکات و دەستبەسەر چەک و ئەو ماتۆڕسکیلەشدا گیراوە کە تاوانەکەی پێئەنجامدراوە.
تۆمەتبارەکان بەپێی ماددەی 406 لە یاسای سزادانی عێراقی دەستبەسەرن.
