ئەحمەد ڕەحیم ئەندامی پەرلەمانی عێراق ئاشکرایکردووە کە لەبەرامبەر ئەوەی لە دانیشتنی سبەینێی پەرلەمان تایبەت بە پۆستی سەرۆک کۆمار ئامادەبن پێشنیازی پارە و پۆستیان بۆکراوە، پێشتریش پەرلەمانتارێکی سەربەخۆ ڕایگەیاند کە بەرتیلیان پێدراوە بۆ هەمان مەبەست.
ئەحمەد ڕەحیم کە پەرلەمانتارێکی سەربەخۆیە بە میدیا عێراقییەکانی وتووە، لەپێناو تەواوکردنی ڕێژەی یاسایی پەرلەمانتاران بۆ دانیشتنی سبەینێی پەرلەمان پارە و پۆست خراوەتە بەرەدەم پەرلەمانتارە سەربەخۆکان و دەڵێت، ” سیاسەتی گێزەر و تێڵا پەیڕەو کراوە” وەک ئاماژە بۆ هەڕەشە و بەرتیل لەبەرامبەر ئامادەبوونیان.
ئاماژەی بەوەکردووە، چوونە ژێرباری هەندێک لە پەرلەمانتاران بۆ ئەو گوشارانە پیرۆزیی پەرلەمان لەکەداردەکات، چونکە پەرلەمان باڵاترین دەسەڵاتی یاسادانانە و گوزارشت لە دەنگی هاوڵاتییان دەکات.
پێشتر خالید عوبێدی ئەندامی سەربەخۆی پەرلەمانی عێراق باسی لەوەکردبوو، لە بەرامبەر بەشداریکردنیان لە دانیشتنی ڕۆژی شەممەی پەرلەمان پێشنیازی بەرتیلیان بۆ کراوە و ڕایگەیاند، “یەکێکی تر لە گاڵتەجاڕییەکانی چاکسازی ئەوەیە پێشنیازی بەرتیلیان خستووەتە بەردەممان بۆ ئەوەی بەشداری لە دانیشتنی پەرلەمان بکەن، ئێمە ناپاکی لە سوێندەکەمان ناکەین و شەرعیەت و ڕەوایەتی بە گەندەڵکاران نابەخشین”.
