كۆمپانیای (كۆكا كۆلا) بەرهەمهێنانی خواردنەوە گازییەكانی لە كیێڤی پایتەختی ئۆكرانیا ڕاگرت.
ئەمڕۆ پێنجشەممە كۆمپانیای (كۆكا كۆلا) لە ڕاگەیەندراوێكیدا بڵاویكردووەتەوە، “بەهۆی ناسەقامگیریی بارودۆخی ئۆكرانیاوە بەرهەمهێنانمان لە پایتەختی ئۆكرانیا ڕاگرتووە و سەلامەتیی كارمەندەكانمان لە پێشینەبووە بۆیە ئەو بڕیارەمان داوە”.
كۆمپانیاكە ئاماژەی بەوە كردووە، لە 24ی مانگی شوباتی 2022ەوە ئەو بڕیارەی داوە و كارمەندەكانی لە كیێڤی پایتەختی ئۆكرانیا كارناكەن.
پێنجشەممەی ڕابردوو شەڕ و هێرشی ڕوسیا بۆسەر ئۆكرانیا دەستیپێكرد و تائێستا بەردەوامە و شەوی ڕابردوو وەزارەتی بەرگریی ڕوسیا بڵاویكردەوە، لە ماوەی یەك هەفتەدا دوو هەزار و 870 ئۆكرانی كوژراون و سێ هەزار و 700 كەسیش برینداربوون، 572 سەربازی ئۆكرانی-ش بەدیلگیراون.
