پەرلەمانتارێكی عێراق داوا لە سەرۆك كۆمار دەكات، لیژنەیەك پێكبهێنێت بۆ لێكۆڵینەوە لە بڕوانامەی خوێندنی قۆناغی ئامادەیی مستەفا كازمی سەرۆك وەزیران.
محاسن خەیری دلێمی، پەرلەمانتاری عێراقە لە فراكسیۆنی سادیقون، لە نووسراوێكدا كە ئاراستەی سەرۆك كۆماری كردووە، دەڵێت، دوای دەركردنی مەرسوومی كۆماری بۆ دەستبەكاربوونی مستەفا كازمی وەك سەرۆك وەزیران لە 9/4/2020دا، دەركەوت سەرۆكایەتیی كۆمار لێكۆڵینەوەی نەكردووە لە بڕوانامەی خوێندنی ئامادەیی ناوبراو”.
پەرلەمانتارەكە ڕایگەیاندووە، بەپێی نووسراوی وەزارەتی پەروەردە، كازمی لە تەمەنی 16 ساڵیدا قۆناغی ئامادەیی تەواوكردووە و لێكۆڵینەوەنەكردن لە بڕوانامەكەی بە پێشێلكردنی دەستوور ناودەبات.
محاسن دلێمی داوا لە سەرۆك كۆمار دەكات، لیژنەیەك لە سەرۆكایەتیی كۆمار و ئەنجومەنی نوێنەران و داواكاریی گشتی پێكبهێنێت بۆ لێكۆڵینەوەكردن لە بڕوانامەی خوێندنی قۆناغی ئامادەیی سەرۆك وەزیران و تەمەنی لە كاتی تەواوكردنی ئەو قۆناغەی خوێندندا.
