ئەنتۆنیۆ كۆنتی ئیتاڵی ڕەتیكردەوە واز لە پۆستی ڕاهێنەرایەتی تۆتنهام بهێنێت بەڵام دڵخۆشیش نییەو بەو دۆخەی تێیكەوتووە.
یانەی تۆتنهام لە پێنج یاریی ڕابردوودا چوار یاریی شكستی هێناوە، ئەوەش وای لە كۆنتی ڕاهێنەر كرد باس لەجێهێشتنی یانە ئینگلیزییەكە بكات.
ئەنتۆنیۆ كۆنتی ئاماژەی بەوەدا كە ئەو قسەی لەگەڵ سەرۆكی تۆتنهام كردووە و پێیناخۆشە یانەكەی لەو دۆخەكە دەبینێت.
وتیشی: ” ئیدارەی یانەی تۆتنهام گرنگی بە من دەدات و دەیەوێت بەردەوام بم، منیش خۆشحاڵم بەو گرنگیدانە، بەڵام كاتێك تیپەكەم شكست دەهێنێت، توڕە دەبم و دەمەوێت بەزوترین كات دۆخەكە چارەسەر بكەم.”
لەدوای شكستی یارییەكەی بێرنلییەوە، كۆنتی ڕاهێنەری تۆتنهام ڕایگەیاند كە ئەو بەم ئەنجامانە ڕازی نییەو بەزوترین كات گفتوگۆ لەگەڵ ئیدارەی تۆتنهام دەكات بۆ یەكلاییكردنەوەی داهاتووی خۆی.
