دەسەڵاتدارانی ئیسرائیل ئەمڕۆ سێشەممە بۆ 198ـەمین جار گوندێكی فەڵەستینییەكانیان خاپووركرد.
گوندەكە ناوی “عەراقیب”ـە، بەشێك لە دانیشتووان خێمەیان هەڵداوە و بەشێكیشیان بە دار و چادر و نایلۆن خانوویان دروستكردووە، تەنها لە ماوەی ئەم دوو مانگەی ئەمساڵدا دوو جار خاپووركراوە و ماڵەكانی دانیشتووانی گوندەكە ڕووخێندراون.
گوندی “عەراقیب” دەكەوێتە ناوچەی “نەقب” و بەشێكە لەو زەوییانەی بە 48 ناسراون، ساڵی 1948 لەكاتی دامەزراندنی دەوڵەتی ئیسرائیل-دا ناوچەكە كەوتووەتە سنووری ئەو وڵاتەوە و فەڵەستینییەكان بە خاكی خۆیانی دەزانن.
لە هەفتاكانی سەدەی ڕابردوودا ئیسرائیل 1250 دۆنم زەویی داوەتەوە بە فەڵەستینییەكان، بەڵام ساڵی 2000 زنجیرەی خاپووركردنی گوندەكە دەستیپێكردووە و میدیای عەرەبی دەڵێت، “لەو كاتەوە تا ئێستا 198 جار خاپووركراوە”.
