ڕێکخراوی تەندروستیی جیهانی ئاشکرایکرد، جیهان هێشتا لەناو پەتای کۆرۆنادایە، پێشبینیش دەکرێت ژمارەیەکی زیاتر لە گۆڕاوی نوێ سەرهەڵبدات.
سۆمیا سوامیناسان گەورە زانای ڕێکخراوی تەندروستیی جیهانی ئەمڕۆ هەینی ڕایگەیاند، “پێمانوایە ڤایرۆسەکە بەردەوام گەشەدەکات و دەگۆڕێت، بۆیە دەکرێت ژمارەیەکی زیاتر لە زنجیرەی ڤایرۆسەکە دەربکەوێت، زنجیرە گۆڕاوەکان شایەنی گرنگی پێدانن، بۆیە ئێمە نەگەیشتووینەتە کۆتایی پەتاکە”.
هەروەها ماچیدیسۆ مۆیتی بەڕێوەبەری ڕێکخراوی تەندروستیی جیهانی لە ئەفریقا ئاماژەی بەوەکردووە، ژمارەی تووشبووانی کۆرۆنا لە کیشوەرەکە بە حەوت هێندەی پێشووتر زیادیکردووە، هەروەها مردنیش بەهۆی ڤایرۆسەکەوە دوو بۆ سێ هێندە زیادیکردووە.
ڕاشیگەیاند، کە زنجیرەی B.A.2 ئێستا لە ناوچەکە زۆرترین بڵاوبوونەوەی هەیە و مایەی نیگەرانییە.
