بەبڕیاری سەرۆكایەتیی ئەنجومەنی نوێنەران، جارێكی دیكە دەرگای خۆپاڵاوتن بۆ پۆستی سەرۆك كۆماری عێراق كرایەوە.
سەرۆكایەتی ئەنجومەنی نوێنەرانی عێراق كۆبووەوە، دواتر لە ڕاگەیەندراوێكدا ئاشكرایكرد، بە بڕیاری ژمارە (4)ی ساڵی 2022، بەهۆی كۆتاییهاتنی ماوەی دەستووریی هەڵبژاردنی سەرۆك كۆمار بەپێی ماددەی (72 / دووەم / ب)ی دەستوور و پشتبەست بە ئەحكامی خۆپاڵاوتن بۆ پۆستی سەرۆك كۆمار ژمارە (8)ی ساڵی 2012، بڕیاردرا بە دووبارە كردنەوەی دەرگای خۆپاڵاوتن بۆ پۆستی سەرۆك كۆماری عێراق.
خۆپاڵاوتن لە سبەینێ-وە دەستپێدەكات و بۆ ماوەی سێ ڕۆژ بەردەوام دەبێت، وەك ئەوەی لە بڕیارەكەدا هاتووە.
دوا وادەی دەستووریی هەڵبژاردنی سەرۆك كۆماری نوێی عێراق ئەمڕۆ بوو، وا دانرابوو دوێنێ كۆبوونەوەی ئەنجومەنی نوێنەران تایبەت بە پرسەكە ئەنجامبدرێت، بەڵام بەهۆی بەشدارینەكردنی زۆرینەی فراكسیۆنەكانی ئەنجومەنی نوێنەران، دانیشتنەكە بۆ ڕاوێژكاری گۆڕدرا و هەڵبژاردنی سەرۆك كۆمار، كە یەكێك لە بڕگەكانی بوو، دواخرا.
دەقی بڕیارەكە:
