سەرەڕای گواستنەوەی بۆناو وەزارەتی گواستنەوە، دەسەڵاتەكانی بەڕێوەبەرایەتیی گشتیی كەشناسیی هەرێم كەمدەكرێنەوە لەوانەش لێدوان بۆ میدیاكان.
بە بڕیاری وەزارەتی گواستنەوە و گەیاندنی هەرێم، بەڕێوەبەرایەتیی گشتی كەشناسی و بومەلەرزەزانیی هەرێم لەناو بینایەكی سەربەخۆوە بۆناو دیوانی وەزارەتەكە گواسترایەوە.
بەپێی زانیارییەكانی تۆڕی میدیایی ئێستا بەڕێوەبەرایەتییەكە بەهەمان ستافی پێشوویەوە گوازراوەتەوە، بەڵام دەسەڵاتەكانیان وەرگیراونەتەوە.
پەیامنێرمان لە هەولێر پێی ڕاگەیاندین، بەڕێوەبەری گشتی و بەرپرسانی دیكەی بەڕێوەبەرایەتییەكە دەسەڵاتی لێدوانیان لێوەرگیراوە و ڕاگەیەنراوەكانیشیان پێویستە لەناو وەزارەت و بە ڕێگەپێدان بێت، هەروەها لە دوێنێوە ڕاگەیەندراوەكانی بەڕێوەبەرایەتییەكە دەربارەی كەشوهەوا و ڕێژەی بارانبارین لە پەیجی وەزارەتی گواستنەوە و گەیاندن بڵاودەكرێنەوە، لەكاتێكدا پێشتر لە پەیجی بەڕێوەبەرایەتییەكە بڵاودەكرانەوە.
دەربارەی هۆكاری گۆڕانكارییەكانیش پەیامنێرمان وتی، بە بیانووی كەمكردنەوەی خەرجییە، بەڵام پێدەچێت هۆكاری دیكە لەئارادابێت.
