لە کۆبوونەوەی وەزیرانی 27 وڵاتی ئەوروپی بە ئامادەبوونی ئیمانیۆل ماکرۆن سەرۆکی فەرەنسا، چەند بڕیارێک لەبارەی چارەنووسی پەنابەران و کۆچبەرانەوە لە وڵاتانی ئەوروپی دراوە، کە بەشێک لە بڕیارەکان دەکرێت لە بەرژەوەندیی کۆچبەر و پەنابەران بێت.
وڵاتانی ئەوروپی لەسەر ئەوە كۆكبوون، کە دەبێت بەیەکسانی پێشوازی بکرێت لە کۆچبەران، زیاتریش پێشوازی لە مامەڵەی یاسایی بکرێت.
لە کۆبوونەوەکەدا چەند بڕیارێک دراون، کە ئەمانەن:
یەکەم: پێویستە وڵاتانی ئەوروپی زیاتر گرنگی بە کۆچبەری یاسایی بدەن، واتا ئەو کۆچبەرانەی بە دۆکیومێنتی فەرمی دەچنە وڵاتانی ئەوروپی، وەک شێوازەکانی ڤیزا، لەوانە “ئیشکردن، یەکگرتنەوەی خێزان و هاوسەرگیری”.
دووەم: ڕێکخراوێک دروستبکرێت بە فۆڕمێکی ئەوروپی تا لە کێشەی کۆچبەر و پەنابەرانی زۆنی ئەوروپا بکۆڵێتەوە و بە یاسایی ڕێکیان بخات.
سێێەم: وڵاتانی ئەوروپی ڕەزامەندبن لە دابەشکردنی کۆچبەران بەسەر وڵاتانی ئەندام لە یەکێتیی ئەوروپا.
چوارەم: ئەو ڕێکخراوەی دروستدەکرێت کاروباری کۆچبەران و پەنابەران ڕێکدەخات و وڵاتانی ئەوروپی ناتوانن ئەو کۆچبەرانە ڕەتبکەنەوە کە ڕێکخراوەکە وەریگرتوون.
پێنجەم: ئەو وڵاتەی کەمتر لە ڕێژەی دیاریکراو کۆچبەر وەربگرێت، دەبێت بڕێک پارە بدات بە سندوقی ئەوروپی بۆ ڕێکخستنەوەی کاروباری کۆچبەران.
