نرخی نەوت ئەمڕۆ هەینی لە بازاڕەکانی جیهاندا بەرزترین ئاستی لە هەشت ساڵی ڕابردوودا تۆمارکرد، نرخەکەی لە 93 دۆلار نزیک دەبێتەوە، ئەمە لەکاتێکدا پیشبینییەکانی پێشتر بۆ نرخی نەوت باسیان لە گەیشتنی نرخەکەی بە 100 دۆلار دەکرد لە ساڵی 2022دا.
شەوی ڕابردوو لە داخستنی بازاڕی نەوتدا نرخەکەی بە ڕێژەی 2% بەرزبووەوە.
نرخی بەرمیلێک نەوتی خاوی برێنت ئەمڕۆ گەیشتە 92.90 دۆلار و بە ڕێژەی 1.96% و بڕی 1.79 دۆلار نرخەکەی بەرزبووەوە.
هەروەها نرخی بەرمیلێک خاوی تەکساس گەیشتە 92.33 دۆلار و بە ڕێژەی 2.28% و بڕی 2.06 دۆلار نرخەکەی بەرزبووەوە.
چاودێرانی بازاڕی نەوت سەرەتای ئەم هەفتەیە ئاماژەیان بۆ ئەوەکرد کە نرخی بەرمیلێک نەوت بۆ 100 دۆلار بەرزدەبێتەوە، دیارترین مەترسیی سەر بازاڕی نەوتیش ئاڵۆزییەکانی نێوان ڕوسیا و ئۆکرانیا و ئەگەری ڕوودانی جەنگە.
