حكومەتی هەرێمی كوردستان ماوەی چوار مانگە شایستە داراییەكانی كۆمپانیاكانی كۆكردنەوەی خۆڵ و خاشاك لە سلێمانیی خەرجنەكردووە، ئەوانیش مانیانگرتووە و ئەنجامەكەی كۆبوونەوەی بڕێكی زۆری پاشماوە و خاشاكە لە گەڕەك و شەقامەكانی شارەكەدا.
ئەمڕۆ سێیەم ڕۆژە ئەو كۆمپانیایانەی ئەركیان كۆكردنەوەی خاشاكە لە سلێمانی، كاركردنیان ڕاگرتووە و ئەوەش بووەتەهۆی كۆبوونەوەی بڕێكی زۆری خۆڵ و خاشاك لە گەڕەك و بەشێك لە شوێنە گشتییەكانی شاری سلێمانی-دا.
نزار كەمال بەڕێوەبەری بەشی خزمەتگوزاری لە شارەوانیی سلێمانی لەبارەی ئەو گرفتەوە بۆ تۆڕی میدیایی ئێستا دوا و ڕایگەیاند، لە سلێمانی دوو كۆمپانیا ئەركی كۆكردنەوەی خۆڵ و خاشاكیان لەئەستۆدایە، لە ماوەی ڕابردوودا وەزارەتی دارایی بڕیاری دابوو مانگانە 60%ی شایستە داراییەكانیان خەرجبكات، بەڵام ئێستا ئەو بڕیارە ڕاگیراوە و ماوەی چوار مانگە شایستە داراییەكانی ئەو دوو كۆمپانیایە خەرجنەكراون.
وەزارەتی دارایی پێیوتوون، لە دوای دابەشكردنی مووچە، شایستە داراییەكانیان خەرجدەكات، بەڵام مانگانە دابەشكردنی مووچە نزیكەی مانگێك دەخایەنێت و لەنێوان كۆتاییهاتنی مووچە دابەشكردنێك و دابەشكردنی مووچەی مانگی دواتردا، كاتێك بۆ خەرجكردنی شایستە داراییەكانی ئەو كۆمپانیایانە نەهڵێدراوەتەوە.
بەڕێوەبەری بەشی خزمەتگوزاری لە شارەوانیی سلێمانی، باسی لە دەرئەنجامە خراپەكانی مانگرتنی ئەو كۆمپانیایانە لەسەر ژیانی هاوڵاتییان و پیسكردنی ژینگە كرد و وتی، “ئێستا بڕێكی زۆری خۆڵ و خاشاك لەناو گەڕەكەكان و سەر شەقام و بەشێك لە شوێنە گشتییەكان كۆبووەتەوە و ئەوەش گرفتی دروستكردووە و ژینگە پیسدەكات”.
لە وەڵامی ئەو پرسیارەی “پاڤێڵ عەبدولڕەحمان” پەیامنێری تۆڕی میدیایی ئێستادا كە بۆچی شارەوانیی سلێمانی لەم دۆخەدا ئەركەكە ناخاتە ئەستۆی خۆی و خاشاكی شار كۆناكاتەوە؟ نزار كەمال وتی، “ئامێرەكانمان كەمن و تەنها دەتوانین خۆڵ و خاشاكی سەر شەقامە گشتییەكان كۆبكەینەوە و توانای پاككردنەوەی ناو گەڕەكەكانمان نییە”.
ماوەیەكە لە چەند پرسێكدا حكومەتی هەرێم و وەزارەتە پەیوەندیدارەكان، جیاوازی لەنێوان سلێمانی و پارێزگاكانی تردا دەكەن، مانگی ڕابردوو كارەبای نیشتمانیی كەمتر دراوە بە سلێمانی، غازی ماڵان كەمتر لە نیوەی پێویست دەگاتە پارێزگاكە، لە دابەشكردنی نەوتی سپیدا حكومەت نیوەی بڕی دابەشكراوی لە هەولێر داوە بە سلێمانی (34 ملیۆن لیتر، بە 17 ملیۆن لیتر)، ئەمە جگە لەوەی ئەو بەنزینەی حكومەت دەیدات بە كۆمپانیای كار و دەیپاڵێوێت، یەك لیتری لێنادرێت بە سلێمانی.
