لە قەزای کەلار (ناوەندی ئیدارەی گەرمیان) لە نزیک قەڵای شێروانە، تەرمی گەنجێک دۆزرایەوە کە شوێنەواری لێدان بە بلۆکی پێوەدیاربووە و کەسوکارەکەی دەڵێن لە دوێنێ ئێوارەوە نەگەڕابووەوە ماڵەوە.
وتەبێژی بەڕێوەبەرایەتیی گشتیی پۆلیسی گەرمیان ڕایگەیاند، “لە نزیک قەڵای شێروانەی کەلار تەرمی گەنجێکی تەمەن 22 ساڵ دۆزراوەتەوە کە بە بلۆک و بەرد کوژراوە”.
گەنجەکە ناوی (ع – م – غ)ـە و لەدایکبووی 2000ـە، دانیشتووی ناحیەی ڕزگاریی سەر بە قەزای کەلارە.
کەسوکاری ئەو گەنجە وتەیان پێشکەش بە پۆلیس کردووە و ئاماژەیان بەوە کردووە، کە کوڕەکەیان ماتۆڕسکیلی پێبووە و لە ئێوارەی سێشەممەوە لە ماڵ دەرچووە و نەگەڕاوەتەوە ماڵەوە.
لە ئێستادا بەمەبەستی توێکاری، تەرمەکەی ڕەوانەی پزیشکیی دادوەریی قەزای کەلار کراوە و بەشی پۆلیسی نەهێشتنی تاوانی گەرمیان دەستیان بە لێکۆڵینەوە کردووە.
