ئیدارەی یانەی مانچستەر یونایتد بابەتی گەڕانی بەدوای ڕاهێنەری نوێدا ڕاگرتووە و پێیوایە ڕاڵف رانیك سەركەوتوو دەبێت لە پۆستەكەیدا.
ڕانیكی ئەڵمانی لە هەشت یاریی خولی ئینگلتەرا توانیویەتی پێنج یاریی سەركەوتن بەدەست بهێنێت و یانەكەشی گەیاندە قۆناغی چوارەمی جامی یەكێتیی ئینگلتەرا.
سەرباری ئەوەی مانچستەر یونایتد ئاستێكی بەرز پێشكەش ناكەن، بەڵام بەرپرسانی یانەكە پێیانوایە لە سەرپەرشتی كردنی ژوری خۆگۆڕین و بەدەستهێنانی ئەنجامی باشدا، رانیك باش دەركەوتووە.
رۆژنامەی زە سەنی بڕیتانی بڵاویكردۆتەوە، ئیدارەی مانچستەر یونایتد بەدوای ڕاهێنەری نوێدا ناگەڕێت و تا كۆتایی وەرز چاوەڕێی ئەنجامەكانی ڕاهێنەر دەكات.
رانیكی تەمەن 63 ساڵ ئاستی زۆربەی یاریزانەكانی بەرزكردۆتەوەو هێڵی بەرگریشی باشكردووە، مانچستەر لە 10 یاریی رابردوودا چوار یاریی گۆڵی لێنەكراوە، هەروەها لە شەش یاریی رابردوودا تەنها لە یەك یاریدا گۆڵی لێكراوە.
